Hyndluljóð (Flateyjarbók)

Velg språk	Norrønt	Islandsk	Norsk	Dansk	Svensk	Færøysk
Denne teksten finnes i flere utgaver på følgende språk ►

Flateyjarbók

Her hefr vpp Hyndluljod queðit vm Ottar heimska

W.G. Collingwood:
Frøya vekker Hyndla

Vaki mær meyia

vaki min vina

Hyndla systir

er i helli byr.

nu er rauckr rauckra

rida vit skulum

til Valhallar

ok til vess heilags.

2.

Bidium herians faudur

i hugum sitia

hann gelldr ok gefr

gull verdugum.

gaf hann Hermodi

hialm ok bryniu

enn Sigmundi

suerd at þiggia.

3.

Gefr hann sigr sonum

enn suinnum aura

mælsku morgum

ok mannvit firum.

byri gefr hann braugnum

enn brag skaalldum

gefr hann mansemi

morgum recki.

4.

Þor mun hon blota

þess mun hon bidia

at hann æ vid þik

einart laati.

þo er honum otijtt

vid iotuns brudir.

5.

Nu taktu vlf þinn

ein af stalli

laat hann renna

med runa minum.

seinn er gaulltr þinn

godveg troda

vil ek ei mar minn

mætann hleda.

6.

Fla ertu Freyia

er þu freistar min

visar þu augum

aa oss þannig.

er þu hefir ver þinn

i valsinne

Ottar iunga

Jnnsteins bur.

7.

Dulin ertu Hyndla

draums ætlig þer

er þu kuedr ver minn

i valsinni.

þar er gaulltr gloar

Gullinbusti

Hilldesuine

er mer hagir giordu

duergar .ij.

Daainn ok Nabbi.

8.

Sennum vit or sodlum

sitia vit skulum

ok vm iofra

ættir dæma

gumna þeirra

er fra godum kuomu.

þeir hafa vediat

vala maalmi

Ottar iungi

ok Angantyr.

9.

Skyllt er at veita

sua at skati enn vngi

faudurleifd hafui

eftir frændr sina.

10.

Haurg hann mer gerdi

hladinn steinum

nu er griot þat

at gleri vordit.

Raud hann i nyiu

nauta blodi

æ trudi Ottar

aa asyniur.

11.

Nu laattu forna

nidia talda

ok vpp bornar

ættir manna.

huat er | Skiolldunga

huat er Skilfinga

(huat er Audlinga)

huat er Ylfinga

huat er haulldborit

huat er hersborit

mest manna val

vnd Midgardi.

12.

Þu ert Ottar

borinn Jnnsteini

enn Jnnsteinn var

Aalf enum gamla.

Aalfr var Vlfui

Vlfr Sæfara

enn Sæfari

Suan enum rauda.

13.

Modur aatti fadir þinn

menium gaufga

hygg ek at hon heti

Hledis gydia.

Frodi var fadir þeirrar

enn Friaut modir

aull þotti ætt su

med yfirmonnum.

14.

Aali var aadr

auflgazstr manna

Halfdan fyrri

hæstr Skiolldunga.

fræg voru folkvig

þau er framir gerdu

huarfla þottu hans verk

med himins skautum.

15.

Efldiz hann vid Eymund

æzstann manna

enn hann (va) Sigtrygg

med suolum eggium.

eiga geck Aalmueig

æzsta quinnu

olu þau ok aattu

aatian sonu.

16.

Þadan eru Skiolldungar

þadan eru Skilfingar

þadan Audlingar

þadan Ynglingar

þadan haulldborit

þadan hersborit

mest manna val

vnd Midgardi.

allt er þat ætt þin

Ottar heimski.

17.

Var Hilldigunn

hennar modir

Suofu barn

ok sækonungs.

allt er þat ætt þin

Ottar heimski.

vardi at viti sua

villtu enn leingra.

18.

Dagr aatti Þoru

dreingia modur

oluzst i ætt þar

æzstir kappar

Fradmar ok Gyrdr

ok Frekar baadir

Amr ok Josurmar

Aalfr enn gamli.

vardar at viti sua

villtu enn leingra.

19.

Ketill het vinr þeirra

Klyps arfþegi

var hann modurfadir

modur þinnar.

þar var Frodi

fyrr enn Kaari

hinn elldri var

Aalfr vm getinn.

20.

Nanna var næst þar

Nauckua dottir

var maugr hennar

maagr þins faudr.

fyrnd er su mægd

fram tel ek leingra

kunna ek baada

Brodd ok Haurfi.

allt er þat ætt þin

Ottar heimski.

21.

Jsolfr ok Aasolfr

Aulmods synir

ok Skurhilldar

Skeckils dottur.

skaltu til telia

skatna margra

allt (er þat ætt þin

Ottar heimski.)

22.

Gunnar baalkr

Grimr ardskafui

Jarnskiolldr Þorir

Vlfr ginandi

Bui ok Brami

Barri ok Reifnir

Tindr ok Tyrfingr

ok tueir Haddingiar.

allt er þat (ætt þin

Ottar heimski.)

23.

Ani Omi

voru bornir

Arngrims synir

ok Eyfuru

braukun berserkia

bauls margskonar

vm laund ok vm laug

sem logi færi.

alt er þat (ætt þin

Ottar heimski.)

24.

Kunna ek baada

Brodd ok Haurfi

voru þeir i hird

Hrolfs ens gamla.

allir bornir

fra Jormunreki

Sigurdar maagi

hlyd þu saugu minni

folkum grims

þess er Fafni vỏ.

25.

Sa var visir

fra Vaulsungi

ok Hiordis

fra Hraudungi

enn Eylimi

fra Audlingum.

allt er þat (ætt þin

Ottar heimski.)

26.

Gunnar ok Haugni

Giuka arfar

ok id sama Gudrun

systir þeirra.

eigi var Guthormr

Giuka ættar

þo var hann brodir

beggia þeirra

allt er þat (ætt þin

Ottar heimski.)

27.

Haralldr hillditaunn

borinn Hræreki

slaunguanbauga

sonr var hann Audar.

Audr diupaudga

Jfuars dottir

enn Radbardr

var Randuers fadir

þeir voru gumnar

godum signadir.

allt (er þat ætt þin

Ottar heimski.)

28.

Voru ellifu

æsir taldir

Balldr er hne

vid bana þufu

þess letz Vali

verdr at hefna

sins brodur

slo hann handbana.

allt er þat (ætt þin

Ottar heimski.)

29.

Var Balldrs fadir

Burs arfþegi

Freyr atti Gerdi

hon var Geymis dottir

iotna ættar

ok Aurbodu.

þo var Þiassi

þeirra frændi

skautgiarn iotun

hans var Skadi dottir.

30.

Mart segium þer

ok munum fleira

vỏrumz at viti sua

villtu enn fleira.

31.

Haki var Huædnu

hoti bezstr sona

enn Huędnu var

Hiorfuardr fadir

Heidr ok Hrossþiofr

Hrimnis kindar.

32.

Eru vaulfur allar

fra Vidolfui

vitkar allir

fra Vilmeidi

skilberendr

fra Suarthofda

iotnar allir

fra Ymi komnir.

33.

Mart segium þer

ok munum fleira

vỏrumzst at viti sua

villtu enn leingra.

34.

Vard einn borin

i aardaga

rammaukin miok

raugna kindar.

niu baaru þann

nadbaufgann mann

iotna meyiar

vid iardar þraum.

35.

Mart segium þer

(ok munum fleira

vỏrumz at viti sua

villtu enn leingra.)

36.

Hann Gialp vm bar

hann Greip vm bar.

bar hann Eistla

ok Eyrgiafa

hann bar Vlfrun

ok Angeyia

Jmdr ok Atla

ok Jarnsaxa.

37.

Sa var aukinn

iardar megni

sualkaulldum sæ

ok sonar dreyra.

38.

Mart (segium þer

ok munum fleira

vỏrumz at viti sua

villtu enn leingra.)

39.

Ol vlf Loki

vid Angrbodu

enn Sleipni gat

vid Suadilfara.

eitt þotti skars

allra feiknazst

þat var brodur fra

Byleistz komit.

40.

Loki af hiarta

lindi brendu

fann hann haalfsuidinn

hugstein komu(!)

vard Loptr kuidugr

af konu illri

þadan er aa folldu

flagd huert komit.

41.

Haf gengr hridum

vid himin sialfann

lidr lond yfir

enn lopt bilar.

þadan koma sniofar

ok snarir vindar

þa er i raadi

at regn vm þrioti.

42.

Vard einn borinn

aullum meiri

sa var aukinn

iardar megni.

þann kueda stilli

storaudgazstann

sif sifiadann

sioutum giorfaullum.

43.

Þa kemr annar

enn maatkari

þo þori ek eigi

þann at nefna.

faair sia nu

fram vm leingra

enn Odinn man

vlfui mæta.

44.

Ber þu minnis aul

minum gesti

sua hann aull mune

ord at tina

þersa rædu

aa þridia morni

þa er þeir Angantyr

ættir reikna.

45.

Snudu burt hedan

sofua lystir mik

fær þu faatt af mer

fridra kosta.

hlypr þu edlvina

vti aa naattum

sem med haufrum

Heidrun fari.

46.

Rant at ædi

ey þreyiandi

skutuzst þer fleiri

vnd fyrir skyrtu.

hleypr þu edlvina

vti aa naattum

(sem med haufrum

Heidrun fari.)

47.

Ek slæ elldi

af ividiu

sua at þu ei kemz

aa burt hedan.

hleypr þu edlvina

(vti a naattum

sem med haufrum

Heidrun fari.)

48.

Hyr se ek brenna

enn haudr loga

verda flestir

fiorlausn þola.

ber þu Ottari

bior at hendi

eitri blandinn miok

illu heilli. h. þu

49.

Ordheill þin

skal engu raada

þottu brudr iotuns

baulfui heitir.

hann skal drecka

dyrar veigar

bid ek Ottari

aull god duga.

---

Fotnoter: