Fjörutíu Íslendinga þættir: Mána þáttr Íslendings

Fra heimskringla.no
Hopp til: navigasjon, søk
Har du husket å støtte opp om ditt favoritt kulturprosjekt? → Bli en Heimskringla-venn og gi et bidrag til Heimskringla.no.

Velg språk Norrønt Islandsk Norsk Dansk Svensk Færøysk
Denne teksten finnes på følgende språk ► Original.gif Dansk.gif
Original.gif


Fjörutíu Íslendinga þættir

Mána þáttr Íslendings

Þórleifur Jónsson gaf út
Reykjavík, 1904




Þeir (Magnús konungr Erlingsson) lágu viku í Unnardys á Lista. Þar var þá með Magnúsi konungi Máni skáld, ok kvað vísu:


Byr gefðu brátt hinn örvi
Björgynjar til mörgum,
þess biðjum vér, þjóðum
þungstóls konungr sólar.
Angrar oss þat’s lengi
útnyrðingr heldr fyrðum,
vindr es til seinn at sundi
sunnrœnn, í dys Unnar.


Konungr mælti: „Vel er kveðit, Tungli“. Enn skyrtur margar lágu í hrúgu, er þvegnar höfðu verit, ok mælti konungr, at hann skyldi hafa eina. Máni kom til hans austr at landsenda; var þá kominn frá Rómi, ok var stafkarl; gekk inn í stofuna, þar er konungr var með sveit sinni, ok var hann þá ekki féligr, Máni, kollóttr ok magr ok nær klæðlauss, ok þó kunni hann konung vegliga at kveðja. Konungr spurði, hverr hann væri? Hann kveðst heita Máni, ok vera íslenzkr, ok þá kominn frá Rómi sunnan. Konungr mælti: „Þú munt kunna frœða, Tungli; sezt niðr ok kveð“. Hann kvað síðan Útfarardrápuna, er Halldórr skvaldri orti um Sigurð konung Jórsalafara, móðurföður Magnúss konungs; ok fekk þetta kvæði góðan róm. Enn leikarar tveir váru í stofunni, er hlaupa létu smárakka yfir hávar stengr fyrir tignum mönnum, ok því hærra sem menn váru tignari. Konungr mælti: „Finnr þú, Tungli, at leikararnir sjá ekki vel til þín? Nú yrktú um þá vísu, ok má vera, at þér verði heldr gagn at“. Þá kvað Máni:


Slœgr ferr gaurr með gígju,
ginn er hér komit inni,
meiðr hefir skjaldar skóða
skripalát, ok pípu.
Rekkr lætr rauða bikkju,
rekkit skvaldr, fyr aldir,
skulut hlýða því þjóðir
þat er skaup, yfir staf hlaupa.


Ok enn kvað hann:


Gígjan syngr, þar’s ganga,
grípa menn til pípu,
fœra fólsku stóra
fram, leikarar bleikir.
Undr’s, hvé augum vendir
umb, sás’s þýtr í trumbu
kníðan lít’k á kauða
kjaft ok blásna hvafta“.


Þá varð mikill hlátr, ok slógu hirðmenn hring um þessa leikara, ok kváðu vísuna, ok æ þat oftast: „kjaft ok blásna hvafta“. Þeim leikurunum þótti nær sem þeir væri í eldi, ok komust út ór stofunni. Enn konungr tók Mána til sín, ok var hann síðan í hans föruneyti til Björgynjar.


HEIMSKRINGLA er et privat initiativ. Prosjektet mottar ikke noen form for offentlig støtte. Vi har kun utgifter og ingen faste inntekter. Kostnader til teknisk drift og utstyr bæres av privatpersoner. Alle økonomiske bidrag mottas derfor med stor takk. Ønsker du eller ditt foretak å støtte prosjektet økonomisk? Ta gjerne kontakt med oss, eller bruk vårt norske kontonummer 97105024499. Du kan også støtte oss via vårt Vipps-nummer 78431. For utenlandske bidrag bruk vårt IBAN-nummer NO6897105024499, med SWIFT-kode: DNBANOKK eller SEPA-kode: SKIANOBB. En kan også overføre penger til HEIMSKRINGLA via PayPal eller vippse via mobilen til 78431. Vi selger også fast annonseplass på venstre sidemeny til rimelig pris. Alle bidragsytere krediteres med navn for sine bidrag.