Maríu jartegnir - Frá Jeronimo klerk
| Velg språk | Norrønt | Islandsk | Norsk | Dansk | Svensk | Færøysk |
|---|---|---|---|---|---|---|
| Denne teksten finnes på følgende språk ► |  |
Frá Jeronimo klerk
B (Varianter fra A)
Frá Jeronimo klerk
Í borg þeiri er Papia heitir var klerkr, sá er Jeronimus hét. Hann var vitr maðr ok vel at sér, hann þiónaði[1] Maríu drótningu með ást mikilli ok söng henni tíðir hvern dag virðuliga. Byskup sá er þar réð fyrir byskupsstóli, tók sótt mikla, þá er guð kallaði hann til sín, ok andaðiz hann. Þá vitraði[2] hin sæla María einum klerk í borginni, at hon villdi sinn klerk til byskups kiósa. Hann sagði vitran þessa borgarmönnum. Síðan var Jeronimus til byskups tekinn[3], ok stýrði hann vel sinni tign.
D (Varianter fra E)
Af klerk er vor frv vitradi at vera skylldi byskup
I borg þeiri er Papia heitir, war einn klerkr er Jeronimus het, hann war godsidugr ok stundadi med ollu kostgæfi ath þiona guds modur Marie, ok sagdi optliga eingiliga heilsan Aue Maria ok sỏng hennar tidir elskandi hana iafnliga. Þath bar til, ath byskup þeirar borgar andadizt, ok þuiat su kirkia hafdi eingan hirdi, sỏfnuduzt saman klerkar ok hỏfdingiar borgarinnar ok skipudu þriggia dægra[4] fỏstu, bidiandi, ath gud syndi þeim, hvern hann willdi byskup lata werda. Hin heilaga Maria witrazt einum manne ok sagdi suo: „Far ok seg lydnum, ath þeir taki minn kanceler til byskups i þessi borg.“ Enn er hann spurdi eptir, huerr hennar canceler wæri, sagdi hon, ath hann het Jeronimus, sa klerkr er dag ok nott er traustr i guds þionustu. Sem þessi madr waknar, segir hann hỏfdingium borgarinnar witranina. Leitudu þeir eptir þessum klerk Jeronimo, ok er þeir fundu hann, war hann wigdr med miklvm fagnadi til byskups. Þessi Jeronimus feck suo med arnadarordi heilagrar guds modur Marie byskupliga tign, ok þionadi alla sina lifdaga[5] medr helgum lifnadi gudi ok hans modur, ok eptir þat andazt hann sælliga ok for til guds.
St2
Klerkr einn Jeronimus at nafne, mikill vnnandi sancte Marie, henni dagliga tidir lesandi, var i borg nockuri i Papey. Þar i borginne andadiz byskup, ok þvrpti annan at taka i stadinn. Þeir er kosninginn ꜳttv, toku at fasta .iii. daga þess bidiandi, at gud birti, huerr vera skal. Sæl Maria vitraþiz einvm þeira ok mælti: „Seg þv, at minn þenustumadr skal byskup vera.“ Hann spyr, huerr sa veri. „Jeronimus, segir hun, er nott ok dag þionar gudi ok mer.“ Hann sagdi uitran þessa ꜹldungum borgarinnar. Var Jeronimus vigdr til byskups at villd alþydu, þenadi hann guds modr, medan hann lifdi, farandi eptir dꜹdann til eilifra fagnada, med gudi verandi.
Fotnoter:
