Ragnarsdrápa
| Velg språk | Norrønt | Islandsk | Norsk | Dansk | Svensk | Færøysk |
|---|---|---|---|---|---|---|
| Denne teksten finnes på følgende språk ► |  |
 |
 |
|||
|
Udvalg af norske og islandske skjaldekvad ved Finnur Jónsson
G.E.C. Gads Forlag - København 1929
Ragnarsdrápa
1.
Vilið Hrafnketill heyra,
hvé hreingróit steini
Þrúðar skalk ok þengil
þjófs iljablað leyfa.
2.
Nema svát góð hins gjalla
gjöld baugnafaðs vildi
meyjar hjóls hinn mæri
mögr Sigurðar Högna.
3.
Knátti eðr við illan
Jörmunrekr at vakna
með dreyrfáar dróttir
draum í sverða flaumi.
Rósta varð í ranni
Randvés höfuðniðja,
þás hrafnbláir hefndu
harma Erps of barmar.
4.
Flaut of set, við sveita,
sóknar alfs, í golfi
hræva dögg, þars höggnar
hendr sem fœtr of kendusk;
fell í blóði blandinn
brunn ölskála (runna
þat's á Leifa landa
laufi fátt) at höfði.
5.
Þar, svát gerðu gyrðan
golfhölkvis sá fylkis,
segls naglfara siglur
saums andvanar standa;
Urðu snemst ok Sörli
samráða þeir Hamðir
hörðum herðimýlum
Hergauts vinu barðir.
6.
Mjök lét stála støkkvir
styðja Gjúka niðja
flaums, þás fjörvi næma
foglhildar mun vildu,
ok bláserkjar birkis
(ball) fagrgötu allir
(ennihögg ok eggjar)
Jónakrs sunum launa.
7.
Þat sék fall á fögrum
flotna randar botni;
Ræs göfumk reiðar mána
Ragnarr ok fjölð sagna.
8.
Ok ofþerris æða
ósk-Rán at þat sínum
af fárhuga fœra
feðr veðr boga hugði,
þás hristi-Sif hringa
hals- hin böls of fylda
bar til byrjar drösla
-baug ørlygis draugi.
9.
Bauða sú til bleyði
bœti-Þrúðr at móti
malma mætum hilmi
men dreyrugra benja.
Svá lét æ, þótt etti,
sem orrostu letti,
jöfrum ulfs at sinna
með algífris lifru.
10.
Letrat lýða stillir
landa vanr á sandi
- þá svall heipt í Högna -
höð glamma mun stöðva,
es þrymregin þremja
þróttig Heðin sóttu,
heldr an Hildar svíra
hringa þeir of fingi.
11.
Ok fyr hönd í hólmi
hveðru brynju Viðris,
feng-eyðandi, fljóða
fordæða nam ráða.
Allr gekk herr und hurðir
Hjarranda framm kyrrar
reiðr at Reifnis skeiði-
raðaralfs mari -bráðum.
12.
Þá má sókn á Svölnis
salpenningi kenna.
Ræs göfumk reiðar mána
Ragnarr ok fjölð sagna.
