Vis kilden til Viðbót við Heiðreks gátur

{| class="toccolours" border="1" width="100%" cellpadding="4" style="border-collapse:collapse"
|- style="background-color:#e9e9e9"  
!align="center" valign="top" width="40%" | '''Velg språk''' !!align="center" valign="top" width="10%" | Norrønt !!align="center" valign="top" width="10%"| Islandsk !!align="center" valign="top" width="10%"| Norsk !!align="center" valign="top" width="10%"| Dansk !!align="center" valign="top" width="10%"| Svensk !!align="center" valign="top" width="10%"| Færøysk
|-
! Denne teksten finnes på følgende språk ► !! [[Fil:Original.gif|32px|link=Viðbót við Heiðreks gátur]] !!  !!  !!  !!  !! 
|-
|}


<center><big>'''[[Fornaldarsögur Norðurlanda]]'''</big>


[[Guðni Jónsson|GUÐNI JÓNSSON]]<br>og<br>[[Bjarni Vilhjálmsson|BJARNI VILHJÁLMSSON]]<br>sáu um útgáfuna


<big>'''Viðbót við Heiðreks gátur'''</big>:(Sbr. [[Hervarar saga ok Heiðreks|Hervarar sögu ok Heiðreks]], 10; kap.).</center>




:"Hverr byggir háfjöll,
:hverr fellr í djúpa dali,
:hverr andalauss lifir,
:hverr æva þegir?
:Heiðrekr konungr,
:hygg þú at gátu."


"Góð er gáta þín, Gestumblindi. Hrafn byggir jafnan á hám fjöllum, en dögg fellr jafnan í djúpa dali, fiskr lifir andalauss, en þjótandi foss þegir aldrigi."
<br>&nbsp;&nbsp; Gestumblindi mælti:


:"Hvat er þat undra,
:er ek úti sá
:fyr döglings durum;
:hvítir fljúgendr
:hellu ljósta,
:en svartir í sand grafast?
:Heiðrekr konungr,
:hygg þú at gátu."


"Góð er gáta þín, Gestumblindi. Smækkast nú gáturnar, en þat er hagl ok regn, því at hagli lýstr á stræti, en regns dropar sökkva í sand ok sækja í jörð."
<br>&nbsp;&nbsp; Gestumblindi mælti:


:"Svartan gölt
:ek sá í sauri vaða
:ok reis honum eigi burst á baki.
:Heiðrekr konungr,
:hygg þú at gátu."


"Góð er gáta þín. Þat er tordýfill, ok er nú margt til týnt, er tordýflar eru ríkra manna spurningar."
<br>&nbsp;&nbsp; Gestumblindi mælti:


:"Hvat er þat undra,
:er ofarliga flýgr,
:armlöð gellr,
:harðar eru, hilmir?
:Heiðrekr konungr,
:hygg þú at gátu."


"Góð er gáta þín. Ör er þat," segir konungr.
<br>&nbsp;&nbsp; Gestumblindi mælti:


:"Hvat er þat, er lýðum lýsir,
:en logi gleypir
:ok keppast of þat vargar ávallt?
:Heiðrekr konungr,
:hygg þú at gátu."


"Góð er gáta þín. Þat er sól. Hún lýsir lönd öll ok skínn yfir alla menn, en Skalli ok Hatti heita vargar; þat eru úlfar, er annarr þeira ferr fyrir, en annarr eptir sólu."
<br>&nbsp;&nbsp; Gestumblindi mælti:


:"Hest sá ek standa,
:hýddi meri,
:dúði dindil,
:drap hlaun und kvið,
:ór skal draga
:ok gjöfta at góða stund.
:Heiðrekr konungr,
:hygg þú at gátu."


Þá svarar konungr: "Þessa gátu skulu ráða hirðmenn mínir." Þeir gátu margs til ok eigi fagrs mjök. Þá mælti konungr, sem hann sá, at þeir gerðu ekki at: "Hest þann kallar þú línvef, en skeið meri hans, er upp ok ofan skal hrista vefinn."
<br>&nbsp;&nbsp; Gestumblindi mælti:


:"Meyjar ek sá
:moldu líkar,
:váru þeim at beðjum björg,
:svartar ok sámar
:í sólviðri,
:en þess at fegri,
:er færa of sér.
:Heiðrekr konungr,
:hygg þú at gátu."


"Góð er gáta þín. Þat eru glæður fölnaðar á arni."
<br>&nbsp;&nbsp; Gestumblindi mælti:


:"Hvat mælti Óðinn
:í eyra Baldri,
:áðr hann var á bál hafðr?"


Konungr svarar:


:"Undr ok argskap
:ok alla bleyði,
:en engi vissi þín þau orð
:utan þú einn,
:ill vættr ok örm."


Konungr brá þá Tyrfingi ok hjó til Gestumblinda, en hann brást í valslíki ok fló út gegnum hallarglugg einn. En sverðit kom á vélit valsins, ok er hann því vélstuttr jafnan síðan, svá sem heiðnir menn trúa. Ok var nú Óðinn honum reiðr orðinn, síðan hann hjó til hans, ok á þeiri nótt var konungr drepinn.

(Hauksbók.) 

{{DEFAULTSORT:Vidbot vid Heidreks gatur}}

[[Kategori:Alfabetisk indeks]]
[[Kategori:Fornaldarsögur]]
[[Kategori:Dróttkvæði og Rímur]]
[[Kategori:Tekster på norrønt]]
[[Kategori:Guðni Jónsson]]
[[Kategori:Bjarni Vilhjálmsson]]