Búadrápa

Fra heimskringla.no
Hopp til: navigasjon, søk
Velg språk Norrønt Islandsk Norsk Dansk Svensk Færøysk
Denne teksten finnes på følgende språk ► Original.gif Dansk.gif


Carmina Scaldica


Udvalg af norske og islandske skjaldekvad ved Finnur Jónsson
G.E.C. Gads Forlag - København 1929


Þorkell Gíslason
Búadrápa


1.
Báru á vali víka
(vel frák þeim líka
seggjum snarræði)
sverð ok herklæði.

2.
Knúði hvast harða
(hljópu marir barða)
hregg (á hefils völlum)
á humra fjöllum;
blá þó hrönn hlýrum,
hraut af brimdýrum
(kili skaut œst alda)
uðr hin sviðkalda.

3.
Báru raukn rasta
rekka geðfasta
(þröng at rym randa)
til ræsis landa.
Við nam víðr mörgum
(vápn vöru grimm törgum,
nýtt gafsk nest hröfnum)
Nóregr skipstöfnum.

4.
Herr bar hátt merki
(á Hamðis serki
grimt kom él eggja),
at geksk lið seggja;
meiddu fjör flotna
(flest varð hlíf brotna,
glumðu gráir oddar)
grjót ok skotbroddar.

5.
Hrutu fyr borð bæði
(brustu herklæði)
höfuð ok hendr manna,
hræ nam vargr kanna.

6.
Neytti herr handa,
hríð vas snörp branda,
fúst vas fár randa
til fjörnis landa.
Fellu fleinbörvar,
flugu af streng örvar,
sungu hátt hjörvar
við hlífar görvar.

7.
Gullu hræs haukar,
hvassir benlaukar
skýfðu liðs leggi,
lamði grjót seggi.
Gnustu gráir malmar
(gengu í sundr hjalmar,
hauks vasat friðr fjöllum)
í fjörnis stöllum.

8.
Búa frák greitt ganga
(gladdi svan hanga,
vökð vas göll geira)
gögnum lið þeira.

9.
Hagl vá hvert eyri,
hraut á lög dreyri
(blóð þó bens árum)
ór bragna sárum.
Þar fell valr víða,
vé sá gyld ríða,
barðisk sveit snarla
á snekkjum jarla.

10.
Örum réð sér snörpum
(slíkt vas raun görpum)
flagð hit forljóta
af fingrum skjóta.
Gerðisk grimt fíkjum
at gumnum ríkjum
(gnýr vas hár hlífa)
hregg ok loptdrífa.

11.
Sté fyr húf hesti
hrófs hinn þrekmesti
gœðir gunnskára;
gladdisk nagr sára.
Niðr kom bens bára,
Búi nam sér hvára
(ferð hykk friðar mistu)
frœkn í hönd kistu.

12.
Feldi Vagn virða
(valdi of nái stirða
hrafn hinn hvassleiti),
- hrunði á borð sveiti -;
þó réð þess dála
(þrymr vas hár stála)
eyðis undglóða
Eiríkr skip hrjóða.