Maríu jartegnir - Frá einum riddara
| Velg språk | Norrønt | Islandsk | Norsk | Dansk | Svensk | Færøysk |
|---|---|---|---|---|---|---|
| Denne teksten finnes på følgende språk ► |  |
 |
Frá einum riddara
B (Varianter fra A)
Frá einum riddara
Svá er sagt, at riddari einn var skamt at herbergi frá munklífi því, er Abetensis heitir, hann var mikill vinr til munklífisins. Þar var Maríu kirkia, ok átti hon allt þat er í munklífinu var. Þessi riddari var vanr opt at sœkia þannug[1] til Maríu kirkiu. Hann átti sökótt við marga menn. Svá bar at [eitt sinn[2], þá er hann hafði farit til messu þannug[3], at hans óvinir urðu þess varir ok settuz fyrir hann, þá er hann fór heim. Ok er hann varð [varr við, at menn vóru með vápnum fyrir honum, þá[4] villdi hann aptr venda. Þá sá hann, at þar kómu enn aðrir umsátarmenn hans fram. Ok er hann sá alla vega frá sér úfrið [ok sér enga ván hiálpar af mönnum[5], þá mælti hann: „Heyrðu, móðir miskunnar! þú sér, en sæla María! minn háska, hiálptu mér [nú í þessum háska[6] ok leys mik frá ótta [ok úfriði[7] minna úvina.“ Ok er hann hafði þetta mælt, þá sá hann konu standa hiá sér, hon[8] hafði skautermar, ok[9] lét koma ermi sína yfir höfuð honum, ok hulði andlit hans ok fal hann, svá at úvinir hans sá hann eigi. En er hann var horfinn þeim, er hans leituðu með úfriði, þá rœddu þeir um: „Hvar[10] kom hann nú?“ Tóku þá ok leituðu hans. En hann sá þá í gegnum ermina, þar er þeir liópu leitandi ok kómu þó hvergi við hann. Þá mælti[11] einn þeira: „Þetta man verit hafa skrimsl en eigi[12] maðr, [er vér sám áðr[13], ok förum heim, [ok man oss engi annarr fyrir hendi[14], ok hefir oss illa tekiz vár för.“ Síðan hurfu þeir á brott. [En er þeir vóru á brottu ok hann háskalauss[15], þá var erminni kipt af höfði honum, ok sá hann hvergi konu, [þá er honum hafði borgit[16]. Fór hann eptir þat með miklum fagnaði til húsa sinna lofandi guð ok sæla Mariam [lífgiafa sinn[17].
Fotnoter:
