Silvurlín

Velg språk	Norrønt	Islandsk	Norsk	Dansk	Svensk	Færøysk
Denne teksten finnes på følgende språk ►

A. C. Evensen

Lesibók
Tórshavn 1911

Silvurlín

1.

Börnini gráta á foldum,

tað hoyrdi móðir undir moldum.

2.

Á foldini gráta börnini smá,

tað hoyrdi móðir, undir moldini lá.

3.

So sára græt tann yngsti svein,

at tað hoyrdi móðir í annan heim.

4.

Silvurlín gongur fyri Mariu blíðu!

"lova mær at vitja börnini míni!"

5.

"Hvussu skalt tú tey funnið fá?

tín hond er fölin, tín fót er sár.

6.

Tak tú mínar glógvar

á tínar sáru lógvar.

7.

Og tak tú mín hin búgvin skó

og drag upp á tín sára fót.

8.

Lovi eg tær at ganga heim,

tú vinn ikki livandi manni mein!

9.

Lovi eg tær at ganga,

tú ger ikki leiðina langa.

10.

Verður tú ikki aftur, fyrr enn hösnini gala,

seint kemur tú í himiríkis salir!"

11.

Silvurlín tók at ganga

myrka leið og langa.

12.

Silvurlín vindur fingur í ring:

"statt upp, Elin, lat meg inn!"

13.

Elin tók at ræðast,

hon hoyrdi tann deyða mæla:

14.

"Tú tarft ikki, Elin, ræðast fyri mær,

einki ger hesin deyði tær."

15.

Silvurlín inn um dyrnar trein,

og tekur hon upp tann fagra svein:

16.

"Eg legði eftir mær öl og breyð,

míni börn tey líða hungur og neyð.

17.

Eg legði eftir mær høgindi blá,

eg meinti, míni börn skyldu hvílt hará.

18.

Eg legði eftir mær stór voxljús,

men míni börn liggja í myrkum húsi.

19.

Eg legði eftir mær altarabók,

eg meinti, míni börn skyldu verða klók.

20.

Eg legði eftir mær akur og ong

og hartil dugandi ungan drong.

21.

Elin, verður tú ikki góð við börnini míni,

eg komi skjótt aftur at vitja tín."

22.

"Fyrr havi eg verið teim stjúkmóðir stríð,

nú skal eg vera teim móðir blíð.

23.

Fyrr havi eg vera teim móðir kald,

nú skal eg vera teim móðir bald."

24.

"Nú líður at tí, at hösnini gala,

eg fái ikki longur við teg talað.

25.

Verði eg ikki aftur, fyrr enn hösnini gala,

seint komi eg í himiríkis salir."

26.

Silvurlín slóg sína hurð í gátt:

"far væl, Elin, hav góða nátt!"

27.

Vaknaði bóndin, í beinki lá:

"hví munu míni börn á gólvinum gá?"

28.

"Tí munu tíni börn á gólvinum

gá, her var Silvurlín at vitja vár."

29.

Bóndin fekk so tunga trá,

hann sprakk av harmi, sum hann lá.