Bjarkamál in fornu

Fra heimskringla.no
Hopp til: navigasjon, søk
Velg språk Norrønt Islandsk Norsk Dansk Svensk Færøysk
Denne teksten finnes i flere utgaver på følgende språk ► Original.gif Dansk.gif Svensk.gif
Original.gif Dansk.gif
Dansk.gif


Fornaldarsögur Norðurlanda


GUÐNI JÓNSSON
og
BJARNI VILHJÁLMSSON
sáu um útgáfuna


Bjarkamál in fornu
(Sbr. Hrólfs saga kraka).


Dagr es upp kominn,
dynja hana fjaðrar,
mál es vílmögum
at vinna efiði;
vaki ok æ vaki
vina höfuð,
allir inir æztu
Aðils ofsinnar.
 
Hár inn harðgreipi,
Hrólfr skjótandi,
ættum góðir menn,
þeir es ekki flýja,
vekka yðr at víni
né at vífs rúnum,
heldr vekk yðr at hörðum
Hildar leiki.
 
Hniginn es í hadd jarðar
Hrólfr inn stórláti.
 
Gramr inn gjöflasti
gæddi hirð sína,
Fenju forverki,
Fáfnis miðgarði,
Glasis glóbarri,
Grana fagrbyrði,
Draupnis dýrsveita,
dúni Grafvitnis.
 
Ýtti örr hilmir,
aldir við tóku,
Sifjar svarðfestum,
svelli dalnauðar,
tregum Otrs gjöldum,
tárum Mardallar,
eldi Órunar,
Iðja glysmálum.
 
Gladdi gunnveitir,
gengum fagrbúnir,
Þjaza þingskilum,
þjóðir hermargar,
Rínar rauðmalmi,
rógi Niflunga,
vísi inn vígdjarfi,
varði hann Baldr þeygi.
 
Svá skalk hann kyrkja
sem inn kámleita
véli viðbjarnar
veggja aldinna.