Noregs Konungatal

Fra heimskringla.no
Hopp til: navigasjon, søk
Velg språk Norrønt Islandsk Norsk Dansk Svensk Færøysk
Denne teksten finnes på følgende språk ► Original.gif Dansk.gif
Dansk.gif


For at alle norrøne tegn som blir brukt i denne artikkelen skal vises korrekt må du ha fonttypen OldNordicTimes installert på din PC eller Mac. OldNordicTimes skal lagres i Fonts i Windows eller installeres i fontboken i Mac OS.


Flateyjarbók


Her hefr

Noreghs kon(un)ga tal

er Sæmundr frodi orti


Brinchmann, Chr. "Norske Konge-sigiller og andre Fyrste-sigiller fra Middelalderen":
Håkon Håkonssons segl
[1] Þat verdr skyllt
ef at skilum yrkia
greppum þeim
at þeir gledi fyrda.
allra hellz
ef eru færi
virdar þeir
enn verit hofdu.


2.
Roa skal fyst
fiarri reydi
ok koma þo nidr
nær aadr luki.
þar haf ek hugt
hrodri þessum
ordum þeim
eftir at mynda.


3.
Þar vil ek fyst
ef virar[2] hlyda
minni mærd
til maals taka.
(at) hugprudr
Haalfdan suarti
erfuiuord
aatti fræknann.


4.
Tok kappsamr
vid konungs nafni
Haralldr braatt
hinn haarfagri.
þa er Haalfdan
hafdi drucknat
i hængs
hallar næfri.


5.
Ok er hann
i (haug) lagidr
a herska
Hringariki.
enn barnvngr
burr Halfdanar
tok framlyndr
vid faudur arfi.


6.
Eigi hann þat eitt
eiga villdi
er hans langfedr
leifdu haanum.
sua var rikr
ræsir Sygna
ok agiarn
vid audgefendr.


7.
At allt land
Elfar a milli
ok Finnmerkr
fylkir aatti.
naadi hann
fyrir Noregi
aullum fyst
einn at raada.


8.
Atti gramr
saa er giafir veitti
barna mart
þeir er bidu þroska.
þui kemr huers
til Harallz siþan
skeylldungs kyn
ens skararfagra.


9.
Reed þria vetr
þundar bediu
siglingr snarr
ok siau tigi.
adr enn lofdung
lifi at ræna
audlings kom
einka dottir.


10.
Þa var haugr
eftir Haralld vorpinn
reisuligr
a Rogalandi.
þess mun æ
vppi leingi
hilldings nafn
Haalfdans sunar.


11.
Tok Eirekr
vid iofurs nafni
blodaux braat
sem buendr villdu
var vigfimr
vetr at landi
Eirekr allz
einn ok fiora.


12.
Aadr en vinsæll
vestan kæmi
Adalsteins
enka fostri.
ok Hakon
haalfrar allrar
brodur sinn
beiddi erfdar.


13.
Enn Eirekr
vndan flydi
heiftar giarn
ok hans synir.
kom hardraadr
hersa mygir
aftr i land
alldri sidan.


14.
Red kappsamr
fyrir konungdomi
Hakon einn
hrid nockura.
var .vj. vetr
samt at landi
tirar giarn
ok tuttugu.


15.
Haadi gramr
gunni aa Fitium
vid Eireks
erfivordu.
vard i hInd
hilmr skotinn
þa er folkmeidr
flotta knadi.


16.
Þat hygg ek braatt
til bana leiddi
litid saar
lofdung snarann.
þar avallt
er visir do
hella kend
til Hakonar.


17.
Enn i haug
Hau(r)dar logdu
sikling þann
a Sæheimi.
hurfu sua
fra Harallz arfa
fræknir menn
fiorfui ræntum


18.
Þa hef ek heyrt
at Haralldr tæki
vaarsæll
iord ok riki.
red Grafelldr
Gunhilldar sun
niu vetr
fyrir Noregi.


19.
Aadr enn Gorms sun
ok Gullharalldr
nafna sinn
at nai gerdi.
var siklingr
sudr at Haalsi
lifi ræntr
i Limafirdi.


20.
Tok hardraadr
eftir Haralld fallinn
Hakon jarl
vid Haars vifi.
sa red tiggi
ok .xx.
.xiij. vetr
Þundar bediu.


21.
Wrdu ei god
i Gaulardal
æfilok
Eiriks faudur.
þa er Karkr þræll
knifi meitti
hattar stall
af Hakoni.


22.
Misti litt
su er laugum styrdi
recka kind
raad hins bezsta.
þa er nordr
i Noregi
kristinn mann
til konungs toku.


23.
Ok Olafr
arfui Tryggua
tok liddriugr
lond ok þegna.
hinn er fimm
a faam vetrum
lofda vinr
lond kristnadi.


24.
Var Olafr
allz at landi
fimm at eins
fadmins galla.
adr Eirekr
med ofrlidi
ræsi þann
romu beiddi.


25.
Su var allz
adr Ormr ryddiz
hrotta rijd
hIrd ok leingi.
þar hefir aulld
er Olafr fell
Sualdrar vIg
sidan kallat.


26.
Red tolf vetr
tiri gaufgadr
Eirekr jarl
fyrir Yggs mani.
adr enn lofdungr
or landi for
vestr vm haf
sa er vini gæddi.


27.
Þa var vfr
Eireks skorinn
adr enn Romfaur
resir hæfe.
ok blodraas
til bana leiddi
vitran iarl
vestr med Englum.


28.
Taldi laund
ok lausafe
sina eign
Sueinn ok Hakon.
ok tua vetr
at tali fyrda
Eireks arf
iarlar hofdu.


29.
Adr i land
med litinn her
konungmadr
kæmi vestan.
ok Olafr
iarli mætti
i Saudungs
sundi midiu.


30.
Vard Hakon þa
hilmi at sueria
eida þers
er Olafr beiddi.
at folkballdr
flyia skylldi
odul sin
til alldrslita.


31.
Baud Olafr
austr fyrir Nesium
snarpa sokn
Sueini iarli.
vard lidfaar
laund at flyia
sigri suiptr
sonr Hakonar.


32.
Feck lofsæll
lond med rin(g)um
Olafr einn
allt hinn digri.
red hrodmIgr
Haralldz hins grænska
fimtan vetr
folldu gryttri.


33.
Bar kappsamr
Knutr hinn riki
biartan seim
vnd bændr marga.
spardi lijtt
vid lenda mean
aud til þess
at þeir iofur vellti.


34.
Reisti her
hilmi a moti
kyniadir vel
Kaalfr ok Þorir.
þar var felldr
fylkir Þrænda
sem stadir
Stikla heita.


35.
Þa bar raun
at ræsir var
Kristi kærr
um konung helgann.
stendr i Kristz
kirkiu midri
heilagt skrin
yfir Haralldz arfa.


36.
Þa red Sueinn
sunr Alfifu
snaka strid
sex fyrir landi.
adr enn Knutz sonr
af konungdomi
vinalauss
vard at flyia.


37.
Kom agætr
austan or Gaurdum
einka sun
Olafs konungs.
feck Magnus
ok mikit riki
odalsiord
alla sina.


38.
Var taallaust
tolf vetr konungr
monnum þarfr
Magnus godi.
aadr i sott
Sygna drottinn
afreks madr
andar misti.


39.
Var harmdaudr
huerium manni
fylkir færdr
þar hans fadir huilir.
sa var nordr
i Noregi
Kristz at kirkiu
konungmadr grafinn.


40.
Nu hefir ek talt
tiu landreka
þa er huerr var
fra Haralldi.
inta ek sua
æfui þeirra
sem Sæmundr
sagdi hinn frodi.


41.
Þo er þess maals
er ek mæla hygg
meiri lutr
miklu eftir.
nu skal þui
þadan af greida
iofra kyns
er enn lifir.


42.
Þat er mer sagt
at Sigurdr risi
Haralldz |[3] sonr
heti fordum.
var Halfdan
Hrisa arfi
enn Sigurdr syrr
son Halfdanar.


43.
Þa gat son
Sigurdr ok Aasta
þann er Haralldz
heiti aatti.
sa reed[4] einn
allvitr konungr
vidri folldu
vetr .xx.


44.
Aadr herfaur
hilmir gerdi
til Englandz
med ofstopa.
felldu vestr
i vapnþrumu
enskir menn
Olafs brodur.


45.
Tok fridsamr
til faudurleifdar
ok aarsæll
Olafr kyrri.
sa rædr gramr
gryttri folldu
samfast vetr[5]
.vij. ok .xx.


46.
Kom ofbraatt
ondu at ræna
mikil sott
Magnus faudur.
sa var enn
audlingr grafinn
Kristz at kirkiu
i kaupangi.


47.
Enn Olafr
aatti enn kyrri
fræknan son
ok fiarr godan.
red Magnus
fyrir mani Yggiar
tiu vetr
at tali fyrda.


48.
Fra ek berfættr
born at ætti
Magnus morg
þau er metord hofdu.
voru þess
þeingils synir
fremdar fliotz
.v. konungar.


49.
For maalsniallr
Magnus konungr
til Jrlandz
vngr at heria.
vard agætr
Eysteins fadir
fleina flaug
felldr i þeirri.


50.
Þat er þa sagt
at saman redi
þiodkonungar
þrir fyrir landi.
þat hef ek heyr(t)
at hafi varla
fremri brædr
a folld komit.


51.
Vard Olafr
vngr hinn godi
lofsæll fystr
lif at missa.
maattu þess
Magnus sunar
skamma stund
skatnar niota.


52.
Gerdi flest
þat er frama gegndi
innan[6] landz
Eysteinn konungr.
vnz hiartverkr
hilmi fræknann
brigda braatt
til bana leiddi.


53.
Þeir eru brædr
baadir lagdir
nordr i grund
a Nidar bacha.
þar stendr haatt
i hofudkirkiu
Olafs skrin
yfir alltari.


54.
Enn Sigurdr
synu lifdi
þeirra leingz
þriggia brædra.
hinn er vt
til Jorsala
frægsta faur
for vr landi.


55.
Reed agætr
ok ellifu
sextan vetr
Sigurdr fyrir riki.
aadr mannskæd
Mæra drottins
banasott
brygdi lifi.


56.
Þess er austr
i Oslo bæ
lofdungs lik
lagit i kistu.
ny grær iord
yfir iofurs beinum
at Halluardz
haarri kirkiu.


57.
Enn biltraudr
bædi lifdi
eftir Sigurd
sonr ok dottir.
þess mun enn
þockum sidarr
dottir nefnd
Dæla hilmis.


58.
Nu er helldr sua
at halla tekr
æfilok
iofra at telia.
het Magnus
maugr Sigurdar
heiptar giarn
enn Haralldr brodir.


59.
Þeir miok rIgsamt
riki hofdu
nanir frændr.
i Noregi.
allt for verr
enn vera skylldi
þess gallt margr
a medal þeirra.


60.
Unz Magnus
misti beggia
sæmdarlaust
sigrs ok heilsu.
þat veit huerr
at Haralldr gilli
var samfast
sex vetr konungr.


61.
Adr enn lofdung
af lifdogum
tirarlaust
toku fyrdar.
sa er at Kristz
kirkiu iardadr
i Biorgin
brodir iofra.


62.
Fra ek landvIrn
eftir lidinn ræsi
Sygna grams
at synir tæki.
var Eysteinn
Jnga brodir
soknar snarr
enn Sigurdr annarr.


63.
Naadi frægt
i fridi standa
þeygi leingr
þeirra riki.
þuiat þeir brædr
er brutu særi
banaspiot
baaruz eftir.


64.
Varat saklaust
þa er Sigurd hofdu
frækinn mann
fiorfi ræntann.
sa er i folld
hia fedr sinum
i Biorgin
buinn at liggia.


65.
Var Eysteinn
austan fiardar
lifi ræntr
af lidi Jnga.
nu er saa gramr
grundu ausinn
andar sparr
austr at Forsi.


66.
Stod einart
Jnga riki
attian vetr
ok adra .vij.
vnz Hakon
med herlidi
austr i Vik
Jnga felldi.


67.
Sa er gunndiarfr
gramr i Oslo
haudri huldr
at hofudkirkiu.
enn Hakon
hlaut at raada
litla stund
landi ok þegnum.


68.
Þui at Erlingr
aatti enn skacki
vænan sun
ok vel borinn.
gaafu landz folk
eftir lidinn Jnga
konungs nafn
Kristinar bur.


69.
Ok Magnus
a Mæri nordr
fremdar giarn
felldi Hakon.
sa var vinsæll
vigdri molldu
ræsir huldr
i Raumsdali.


70.
Var sokndiarfr
sun Kristinar
siautian vetr
i samt konungr.
vnz agætr
austr i Sogni
frækinn gramr
felldi Suerrir.


71.
Nu er gunndiarfs
i grauf lagit
Magnus lik
i musteri.
a Biorgin
þar er buit gulli
stendr skrautgiort
skrin Sunnifu.


72.
Nu er þat synt
at Suerrir rædr
ognar aurr
einn fyrir riki.
aullu þi
er aatt hefir
Harallz kyn
Haalfdans sunar.


73.
Þo skal ek enn
þockum fleira
fra Berfætz
bornum segia.
audlings þess
er alldrigi
elld ne iern
ottaz hafdi.


74.
Het ein doglings
dottir Þora
su var gift
gofgum manni.
allra hellz
su er Jon fæddi
var sonsæl
systir iofra.


75.
Kom raaduond
ræsis dottir
til næfrlandz
nykra borger.
gofuglynd
godrar tidar
allra helltz
Jslendingum.


76.
Þui at hugrackr
henni at fylgdi
einka sonr
iofra systur
hiartaprudr
sa er hefir all(r)a
yta vinr
ordlof fira.


77.
Þat er vist
at Jons verda
metord mest
mistar runna
einardlyndz
þar er eiguz vid
merkismenn
maalum skipta.


78.
Nu vill kappi
vid konungs frænda
afreks madr
eingi deila.
giftudriugr
sem glikt er
verdr vinsæll
vella deilir.


79.
Þotti aurr
ok osuikall
fadir hans
flestum monnum.
vissi Loftr
vndir lIfi skyia
vuin sijn
eingann fæddann.


80.
Enn Sæmundr
sina vissi
Sigfus sonr
snilli iafnan.
fadir Loptz
sa er firum þotti
haufudsmadr
vid hluti alla.


81.
Þat hefir ætt
Oddaveria
iofra kyns
alla prydda.
dottur sun
sa er dogum oftar
fremst margnytr
Magnus konungs.


82.
Nefnda ek aadr
nær þria tigi
tigna manna
tijri gædda.
þrætulaust
enn þeir eru
Jons ættar
allir iofrar.


83.
Nu bid ek Krist
at konungs spialli
hafi þat allt
er hann æskir ser
giftudriugr
af gudi sialfum
allan alldr
ok vnads nioti.




Fotnoter:

  1. 581
  2. r. verar ell. virdar
  3. 582
  4. reid Cd.
  5. vestr Cd.
  6. innaz Cd.