Den tridje Gudrunkvida

Fra heimskringla.no
Hopp til: navigasjon, søk
Velg språk Norrønt Islandsk Norsk Dansk Svensk Færøysk
Denne teksten finnes i flere utgaver på følgende språk ► Original.gif Norsk.gif Dansk.gif Svensk.gif
Norsk.gif Dansk.gif Svensk.gif
Dansk.gif Svensk.gif
Dansk.gif Svensk.gif


Edda-Kvæde
Norrøne fornsongar
(Andre utgåve, 1928)


På nynorsk ved
Ivar Mortensson-Egnund


Den tridje Gudrunkvida


Herkja het terna hans Atle, ho hadde vori frilla hans. Ho fortalde Atle at ho hadde set Tjodrek og Gudrun halde lag. Atle var harm for dette.


1.
Då kvad Gudrun:
"Kva berst det fyre,
Budle-sonen?
Du sorgsam her sviv
og smiler aldri.
Heller det høvde
ein hovding som du,
at du karane kveikte
og kona di ansa."

2.
Atle Kvad:
"Trege det gav meg,
Gudrun kona,
det av Herkja eg høyrde
i halli i dag,
at Tjodrek og du
dykk tøygde i hop
og saman kvilde
under kvite lin."

3.
Gudrun kvad:
"Eg vil alle
eidar sverja
ved heilage steinen,
den skire kvite:
aldri Tjodmar og eg
oss tøygde i hop
meir enn det syskin
sømer å gjera.

4.
Ein einaste gong
eg heve lagt
handi om hals
på hovding gjæve.
Annleis enn sagt er
var samrøda vår,
som trøytte og tyngde
oss tydde i hop.

5.
Her kom Tjodrek
med tretti hermenn,
alle dei tretti
tapt hev han no.
Eg brynje-budde menn
og brødrar tapte,
odal-ætti mi
all du tynte.

6.
Bodsend Sakse,
sudmanna-drotnen,
han kann signe
sjodande kjerald."
Inn i salen der skreid
sju hundrad mann,
fyrr konge-kona
i kjetilen greip.

7.
Gudrun kvad:
"Her er 'kje Hogne
her er 'kje Gunnar,
sæle brødrar
eg ser ikkje meir.
Elles Hogne hemnde
min harme med sverd;
mi skuldløyse syne
sjølv no må eg."

8.
Bjarte handi
til botnen ho stakk
og greip so fast
i glime-steinen:
"Sjå no, sellar,
eg skuldlaus er røynd,
heilag og heil
i den heite domen."

9.
Lo i hugen
hovdingen sælt,
då hendene hennar
heile han såg:
"Kom no, Herkja,
til kjelen her fram,
du som Gudrun
grande vilde."

10.
Syrgjeleg syn
å sjå var dette,
kor Herkja si hand
heiltupp var svidd.
Sidan dei grov ho
i gor-myri ned.
Soleis vart hemnd
harmen til Gudrun.